Framkvæmdir hafnar við endurbætur á Flugstöð Leifs Eiríkssonar

Vegna fyrirsjáanlegrar aukningar á farþegaflugi um Keflavíkurflugvöll á álagstíma að morgni og síðdegis er ljóst að auka verður afgreiðslustæði flugvéla við flugstöð Leifs Eiríkssonar. Til þess að afgreiða megi allt áætlunarflug á réttum tíma var ákveðið að nota flugvélastæði sem ekki eru tengd flugstöðinni með landgöngubrúm, fyrir farþegaflug á álagstíma. Afgreiðslustæðum farþegaflugs fjölgar því úr 14 í 16 og verður farþegum ekið milli flugstöðvar og flugvéla á umræddum tveimur afgreiðslustæðum.

Þessi tilhögun krefst vissra endurbóta á flugstöðinni svo koma megi farþegum inn og út úr byggingunni með skjótum hætti auk þess sem afmarka þarf biðsvæði fyrir umrædda farþega í brottfararsal á annarri hæð í norðurbyggingu flugstöðvarinnar. Ákveðið hefur verið að biðsvæðið komi þar sem nú er svonefndur Panorama bar IGS og að byggingin verði stækkuð lítillega til austurs á bak við verslunina Elkó þar sem komið verður fyrir stiga og lyftu fyrir farþega á leið út í bifreiðar á flughlaðinu. Fyrir næsta sumar verður einungis þörf á að taka biðsalinn aftan við Elkó í notkun og ef áætlanir flugfélaga fyrir sumarið 2013 ganga eftir þarf að færa Panorama barinn og taka seinni biðsalinn í notkun. Jafnframt er gert ráð fyrir endurbótum við komusal á fyrstu hæð fyrir komufarþega frá Norður-Ameríku sem ekið er frá suðurbyggingu flugstöðvarinnar.

Framkvæmdin felst m.a. í stækkun annarrar hæðar norðurbyggingar flugstöðvarinnar með svölum til austurs þar sem komið verður fyrir biðsvæði farþega ásamt breytingum á Panoramabar í annað biðsvæði. Reist verður upphitað stigahús og komið fyrir lyftu ásamt yfirbyggðu göngusvæði á flughlaði frá stigahúsi að biðsvæði fólksflutningabifreiðar sem flytur farþega að flugvélum. Einnig verða gerðar breytingar á vörumóttöku til þess að auðvelda aðgengi komufarþega inn í töskusal á fyrstu hæð. Einnig felast í verkinu breytingar á vörumóttöku við flughlaðið og færsla girðingar við flughlað ásamt hliði og brunahana.

Opinbert útboð fór fram vegna verksins og hafa samningar verið gerðir við verktakafyrirtækið Atafl sem átti lægsta tilboð í verkið. Gert er ráð fyrir að heildarkostaður við verkið nemi 350 milljónum króna og að framkvæmdum verði lokið fyrir 1. ágúst næstkomandi.