Fram Foods kaupir Sjöstjörnuhúsið

Stórfyrirtækið Fram Foods hf. hefur keypt hús Sjöstjörnunnar við Hafnarbakka 11 í Njarðvík, af Reykjanesbæ. Kaupverðið eru 34 milljónir króna, staðgreitt, og var gengið frá kaupunum í morgun.

Halldór Þórarinsson, stjórnarformaður Fram Foods, sagði í samtali við Víkurfréttir að stefnan hjá þeim væri að endurnýja tæki og vélar í húsinu og nota sem kæli- og frystigeymslu fyrir afurðir sínar.

„Við erum sífellt að auka umsvif okkar hér á landi og þessi kaup eru hluti af því ferli,“  sagði Halldór. „Við höfum ekkert ákveðið í sambandi við að hefja vinnslu í húsunum en aðstaðan býður upp á möguleika á því.“

Fram Foods eru með starfsemi víða um Evrópu, m.a. verksmiðjur í Frakklandi og Svíþjóð og söluskrifstofur í Finnlandi og Þýskalandi. Þá á fyrirtækið hlut í verksmiðju í Chile sem sérhæfir sig í vinnslu á krabba og reyktum laxi fyrir heimsmarkað.

Höfuðstöðvarnar eru þó að Brekkustíg 22 í Reykjanesbæ auk þess sem þar er starfrækt verksmiðja þar sem unnin eru loðnu- og grásleppuhrogn, loðna og Bolfiskflök. Afurðirnar eru unnar í neytendapakkningar eða fyrir verksmiðjur fyrirtækisins erlendis.

Fram kemur á vef fyrirtækisins að velta þess sé um 4 milljarðar á ársgrundvelli og starfsmenn eru um 400 talsins í sjö löndum. Þar af eru rúmlega 30 ársstörf í Reykjanesbæ.

„Við erum með þessu að efla okkar starfsemi og það er mjög bjart framundan hjá okkur,“ segir Halldór að lokum.

Reykjanesbæ hefur einnig borist kauptilboð í húsnæði Íshúss Njarðvíkur frá Hauki Guðmundssyni, athafnamanni og fyrrum eiganda Íshússins. Tilboðið er að upphæð  kr. 47.554.444,- staðgreitt og samþykkti bæjarráð Reykjanesbæjar að ganga að tilboðinu að því tilskildu að greiðsla hafi borist fyrir kl. 12.00 miðvikudaginn 26. janúar n.k.