Fræðslukvöld um netnotkun barna og unglinga

Foreldrafélög og foreldraráð Grunnskólanna í Reykjanesbæ, FFGÍR, bjóða til fræðslukvölds fyrir foreldra þar sem fjallað verður um netnotkun barna og unglinga fimmtudagskvöldið 7. apríl nk. Fundurinn fer fram í 88-húsinu að Hafnargötu 88 á milli 20 og 22. Allir eru velkomnir, þátttaka er ókeypis og foreldrum barna og unglinga á öllum aldri er sérstaklega boðið að taka þátt.

Meðal þeirra sem taka til máls eru eftirfarandi:
Hafþór Barði Birgisson, forstöðumaður Fjörheima og 88 Hússins útskýrir ýmislegt tengd Netinu, t.d. hvernig blogg, MSN og webcam virka, og gefur raunveruleg dæmi um netnotkun barna og ungmenna hér í bæ.

Guðmundur Brói Sigurðsson, grunnskólakennari í upplýsinga-og tæknimennt deilir sinni þekkingu og reynslu af tölvum og tölvukennslu, og gefur ýmis ráð til foreldra.

Anna Margrét Sigurðardóttir, verkefnastjóri SAFT hjá Heimili og skóla-landssamtökum foreldra, mun segja frá könnunum sem gerðar hafa verið um þessi mál, og gefa foreldrum góð heilræði um aukið öryggi í netnotkun. SAFT er átak um örugga notkun barna og ungmenna á Netinu og nýjum miðlum.

Auk þess verða opnar umræður þar sem ræðumenn svara spurningum foreldra.

Í tilkynningu frá FFGÍR kemur fram að mörg börn og unglingar hafa t.d. gefið of miklar persónulegar upplýsingar um sig við ókunnuga, komið illa fram við aðra undir nafnleynd og ekki gætt almennra mannasiða í samskiptum við aðra á Netinu, komið upp miklum kostnaði í kringum netnotkun sína vegna niðurhals o.fl., hafa viljandi og óviljandi séð gróft ofbeldis-og klámefni, jafnvel mælt sér mót við einstaklinga sem þau hafa kynnst eingöngu í gegnum Netið og þau segjast deila reynslu sinni af Netinu í mjög litlum mæli með foreldrum.

Kannanir sýna það að margir foreldrar eru óöruggir hvað viðkemur tölvu-og farsímanotkun barna sinna. Aðrir telja sig fylgjast með og vita ágætlega hvað þau aðhafast, en börnin sjálf segja að það sé ekki rétt. Stór hluti þeirra segist t.d. geta komist á Netið án vitundar og eftirlits foreldra. Þau upplifa ekki að verið sé að leiðbeina þeim og fræða um þessi efni, Því er mikil þörf á fræðslu og leiðbeiningum til foreldra, enda fer langmest netnotkun fram inni á heimilunum.

Því hvetur FFGÍR foreldra barna og  unglinga á öllum aldri sérstaklega til að koma á fræðslukvöldið í 88 Húsinu. Þar er kjörið tækifæri til að deila sinni reynslu og læra eitthvað nýtt.