Frábær viðbrögð eldri borgara í eldvarnaátaki

Kvennasveitin Dagbjörg heimsótti á dögunum 363 heimili á Suðurnesjum með það að markmiði að gefa eldri borgurum á svæðinu límmiða með neyðarnúmerinu 112 til að setja á heimilissíma þeirra og bæklinginn „Örugg efri ár“.

Í bæklingnum er fólki bent á að yfirfara öryggisatriði á heimilinu og styðjast við gátlista sem er aftast í ritinu. Þá var eldri borgurum boðið að fá starfsmenn Brunavarna Suðurnesja í heimsókn til að yfirfara eldvarnir heimilanna og setja upp reykskynjara og gefa ábendingar um það sem betur mætti fara.
Talsmenn kvennasveitarinnar segja að allsstaðar hafi verið tekið vel á móti þeim og í 75 til 80% tilvika þáði fólk að límmiðarnir væru settir á símana þeirra. Nokkrir þáðu boðið um aðstoð við að fylla út gátlistana og 49 buðu BS-menn velkomna.

Dagbjargarkonur sögðu að lokum að athyglisvert væri hve margir hefðu brugðist við grein Víkurfrétta um væntanlegar heimsóknir. Varð hún til þess að margir huguðu í framhaldinu að því að bæta eldvarnir á heimilinu og voru þegar búnir að vinna í þeim málum.