Frábær aðstaða í Lífsstíl

Viðskiptavinum líkamsræktarstöðvarinnar Lífsstíl fjölgar ört enda er aðstaðan þar til fyrirmyndar. Nú hefur verið lokið við að ganga frá sturtuklefunum og á næstunni er von á nýjum ljósabekkjum. Ný tímatafla er komin út og þar geta flestir fundið eitthvað við sitt hæfi.
Nýjum tækjum hefur verið komið fyrir í tækjasalnum, m.a. Schwinn þrekhjóli, tveimur skíðavélum eða svokölluðum cross trainer. Skíðavélarnar eru notaðar til upphitunar en í þeim næst gríðarleg fitubrennsla og styrking fyrir neðra hluta líkamans.
Smith-vélin er einnig nýung hjá Lífsstíl en hún er notuð til að aðstoða við að halda góðu formi á lyftum, þ.e. axlapressum og hnébeygjum. Vélin er sögð ýta undir að menn taki vel á, án þess að eiga á hættu að slasast.
Að sögn Sigrúnar Lilju, starfsmanns Lífsstíls er líka búið að bæta við hlaupabrettum, þannig að þau eru nú sex og einni stigvél, en hún er góð til fitubrennslu og styrkir læri og rass. Afgreiðslan hefur fengið andlitslyftingu en það er búið að stækka hana og koma upp snakkbar. Þar geta viðskiptavinir keypt sér hressingu fyrir eða eftir æfingu, eins og banana, skyr, orkustykki og annað hollmeti.