Frá unglingum til miðaldra fólks

Hann er 17 ára gamall og hann prófaði fyrst hass þegar hann var 15 ára. Hann vill ekki láta nafns síns getið, en hér er hann kallaður Hilmar. Hilmar hefur búið í Reykjanesbæ frá því hann fæddist. Hann er ósköp venjulegur ungur drengur og sker sig að engu leyti úr þeirri ímynd sem fólk hefur um ungt fólk á þessum aldri. Hilmar hefur fengist við það að selja kannabisefni frá því hann byrjaði að reykja hass daglega.Hann segir að síðasta sumar hafi hann selt um 30 grömm af hassi á viku: „Ég var að selja fólki frá 16 ára og upp í 40-50 ára,“ segir Hilmar. Hilmar segir að ungu fólki sem hann þekkir finnist flott að heyra um einhvern sem er að reykja hass: „Það eru ekkert voðalega margir sem þora að prófa, en ég heyri að það eru margir sem langar virkilega til þess. Krökkunum finnst töff að tala um þetta og þeir vilja heyra sögur um einhverja sem hafa prófað. Ef ég ætti að giska á hvað margir eru að prófa, þá myndi ég segja að einn af hverjum tíu unglingum í Reykjanesbæ sé að prófa hass,“ segir Hilmar og bætir því við að honum finnist stundum of mikið gert úr fíkniefnavanda ungs fólks: „Það eru alltaf einhverjir sem eru að prófa, en það er ekkert svo mikið af því.“
Hilmar segir að hann viti um 2-3 aðila á hans aldri í Reykjanesbæ sem eru að „henda út“ (slangur hjá fíkniefnasölum sem þeir nota þegar þeir tala um að selja fíkniefni) hassi en þeir eru ekki stórir. Það er náttúrulega töluverður fjöldi af eldri strákum sem eru að selja.
Að sögn Hilmars hefur hann heyrt töluvert um svokallaðar handrukkanir og segist meðal annars heyrt um söguna sem birtist í síðustu Víkurfréttum, en þar var greint frá skuld sem hækkaði um 80 þúsund krónur: „Maður heyrir mikið af sögum og það er staðreynd að það er verið að rukka hér,“ segir Hilmar.
Ættingjar Hilmars vita ekki af því að hann neyti fíkniefna og hann segir að það sé ekkert mál að fela neysluna fyrir hverjum sem hann vilji: „Núna fæ ég mér að reykja tvisvar á dag, þegar ég kem heim úr vinnu og svo þegar ég fer að sofa. Ættingja mína grunar ekki neitt og það er ekkert mál að fela þetta fyrir þeim,“ segir Hilmar að lokum.