Fótbrotnaði við gosstöðvarnar

Síðdegis í dag var björgunarsveitin Þorbjörn í Grindavík kölluð út vegna konu sem hafði dottið og fótbrotnað á gönguleiðinni að gosstöðvunum á Fagradalsfjalli.

Konan var hluti af hópi fólks sem var á leið að gosstöðvunum. Slysið varð á svokölluðum Stórhól. Lögregla, sjúkraflutningafólk og björgunarsveitarfólk fór upp göngustíginn til að hlúa að konunni og undirbúa flutning.

Ástand hennar var metið svo að einfaldast væri að fá þyrlu til flutnings, en þyrla Landhelgisgæslunnar var þá stödd á Ísafirði og ljóst að um tveggja tíma bið yrði eftir henni.

Konan var því verkjastillt, búið um hana í börum og flutt með buggy bíl niður af fjalli, til móts við björgunarsveitarbíl. Hún var svo flutt yfir í björgunarsveitarbíl sem fór með hana niður að þeim stað sem sjúkrabíll hafði komist á. Hún var svo flutt á sjúkrahús með sjúkrabíl.

Aðgerðum var lokið um 18:30, tveimur klukkustundum eftir að útkall barst.

Meðfylgjandi er mynd af vettvangi þar sem verið var að skipta frá buggy bíl yfir í björgunarsveitarbíl.