Foss, eimbað og sérhannað nuddsvæði opnað við Bláa lónið

Skemmtileg viðbót við heilsulindina Bláa lónið hefur verið tekin í notkun. Viðbótin felst í fossi, eimbaði, gufubaði og sérhönnuðu svæði fyrir nudd- og líkamsmeðferðir og hafa viðbæturnar hlotið góðar viðtökur meðal gesta heilsulindarinnar. Tveggja metra hár foss sem í rennur Bláa lóns vatn setur skemmtilegan svip á svæðið. En gestir geta staðið undir fossinum og upplifað endurnærandi vatnsnudd.Samspil hrauns, kísils og lóns myndar heillandi umgjörð um eimbaðið enda minna veggirnir á kísil og blátt lónið rennur inn í það. Gufa eimbaðsins er sölt og fyrir vikið verður öndun léttari inni í eimbaðinu. Auðvelt er að njóta útsýnis yfir lónið úr gufubaði en framhlið þess er að mestu leyti úr gleri. Þá geta gestir kælt sig með því að ganga í gegnum léttan vatnsúða.

Að bera á sig hvítan kísil er fyrir marga ómissandi hluti af heimsókn í Bláa lónið. Kíslinum hefur verið komið fyrir í sérhönnuðum trékössum sem staðsettir eru við lónið og hefur aðgengi að kíslinum því verið auðveldað.

Sigríður Sigþórsdóttir, VA Arkitektum ehf, er aðalhönnuður aðstöðunnar, en hún er einnig aðalhönnuður heilsulindarinnar.