Forvarnir í FS

Það má með sanni segja að forvarnir verði í fyrirrúmi í Fjölbrautaskóla Suðurnesja í næstu viku, en þar verður þétt dagskrá af kynningarfundum og námskeiðum fyrir nemendur á Forvarnarviku FS.

Á mánudag hefst vikan formlega með því að átakið verður kynnt og ný vefsíða forvarnarfulltrúa verður opnuð, en þar má nálgast upplýsingar um m og einnig finna tengla inn á hinar ýmsu forvarnarsíður og spjallsvæði.
Síðar um daginn verður Magnús Jónsson með forvarnarfyrirlestur fyrir nemendur og um kvöldið verður hann með fund fyrir foreldra og forráðamenn.

Á meðal annarra dagskrárliða má nefna að Guðjón Bergmann verður með þriggja daga námskeið fyrir þá sem vilja hætta að reykja auk þess sem verkefni Tóbaksvarnarráðs, „Vertu Ferskur" er kynnt fyrir nemendum á þriðjudag.
Á fimmtudaginn verður Hafþór Barði Birgisson, forstöðumaður 88-hússins, með fyrirlestur fyrir SAM nemendur um reykingar, heilbrigt líf, mikilvægi hreyfingar og holls mataræðis.

Kolbrún Marelsdóttir, nýráðinn forvarnarfulltrúi FS, sagði samtali við víkurfréttir að hún væri spennt að sjá hvernig til tækist. „Við ætlum að byrja starfið af krafti og koma á fót sérstakri forvarnarnefnd nemenda þar sem þau taka sjálf þátt í starfinu og vinna náið með okkur. Þetta er í fyrsta sinn sem við erum með svona átak, en við sefnum að því að gera þetta að árlegum viðburði."

Forvarnarvikunni lýkur að kvöldi fimmtudags með glæsiballi í sal skólans þar sem nemendur og kennarar mæta prúðbúin og skemmta sér án vímuefna. Þar verða ýmsar skemmtilegar uppákomur sem útskriftaraðallinn mun sjá um.