Forsetinn og menntamálaráðherra fengu bók um Ásbrú

Þriggja ára afmæli Keilis, miðstöðvar vísinda, fræða og atvinnulífs, var fagnað að Ásbrú í dag. Við lok afmælisveislunnar færði Kjartan Þór Eiríksson, framkvæmdastjóri Kadeco, Ólafi Ragnari Grímssyni forseta Íslands, Katrínu Jakobsdóttur menntamálaráðherra og Hjálmari Árnasyni framkvæmdastjóra Keilis, eintök af bókinni Úr varnarstöð í vísindasamfélag - samtímasaga í máli og myndum, sem Hilmar Bragi Bárðarson blaðamaður á Víkurfréttum tók saman.

Segja má að Þróunarfélag Keflavíkurflugvallar sé nokkurs konar foreldri Keilis, en Keilir er ein helsta stoðin í þeirri uppbyggingu sem á sér stað að Ásbrú. Í bókinni sem afhent var við hátíðlega athöfn í dag er þeirri uppbyggingu sem á sér stað að Ásbrú gerð ítarleg skil.

Á myndinni eru f.v.: Kjartan Þór Eiríksson, Hjálmar Árnason, Ólafur Ragnar Grímsson og Katrín Jakobsdóttir. VF-mynd: Ellert Grétarsson