Formaður segir af sér

Formaður skipulags- og bygginganefndar sveitarfélagsins Voga hefur sagt af sér. Þetta kom fram á bæjarráðsfundi nú fyrir helgi. Gjörðir formannsins höfðu síðan í febrúar sætt harðri gagnrýni H-listans en honum var legið á hálsi fyrir að hafa farið á sveig við lög með því að byggja á lóð þar sem eignarhald var óljóst.

Í febrúar síðastliðnum kröfðust bæjarfulltrúar H-listans þess að formaður skipulags- og bygginganefnar viki sæti á meðan unnið væri í málinu. Þá lá fyrir greinargerð byggingafulltrúa ásamt höfnun bygginganefndar á stöðuleyfi fyrir umrædda lóð þar sem eignarhald á henni var óljóst. Í bókun H-listans sagði að eins og byggingareglugerð mælti fyrir um bæri að sækja um leyfi fyrir öllum þeim framkvæmdum sem sett gætu varanlega ásýnd á landið. Það sem framkvæmt hefði verið á lóðinni án leyfis bæri að fjarlægja.

Það var síðan á bæjarstjórnarfundi í byrjun maí sem fulltrúar H-listans óskuðu eftir viðbrögðum frá bæjarfulltrúum meirihlutans og ítrekuðu fyrri bókanir þess efnis að formaður nefndarinnar bæri að víkja.

Sú hefur orðið raunin eins og áður segir. Bæjarráð þakkar formanninum fyrir vel unnin störf í þágu samfélagsins, segir í fundargerð.

Mynd/OK: Horft yfir Voga.