Flugvallarvegurinn er bæjarskömm

Ástand Flugvallarvegar í Reykjanesbæ hefur án efa aldrei verið eins slæmt og þessa dagana. Þar er hola við holu og vegurinn í raun illfær. Vegfarendur kvarta sáran undan veginum og eru langþreyttir á bið eftir vegabótum. Þegar svara er leitað hjá Reykjanesbæ er svarið að senn komi vegur sem leysi þennan vegarkafla af hólmi.

Íbúar við Háaleiti í Keflavík hafa einnig verið í sambandi við blaðið vegna Flugvallarvegar og segja farir sínar ekki sléttar. Þegar þurrt sé í veðri standi rykmökkur frá umferð um Flugvallarveginn yfir nálæga byggð og ekki sé hægt að hafa opna glugga fyrir mold og ryki frá Flugvallarvegi.

Meðfylgjandi mynd tók vegfarandi um Flugvallarveg í hádeginu og hún segir meira en mörg orð um ástand vegarins, sem lesandi kaus að kalla bæjarskömmina.