Fjórir á slysadeild eftir árekstur á Brautinni

Fjórir slösuðust í árekstri  á Reykjanesbraut um kl. 18.30 í gærkvöldi. Þrír voru fluttir til aðhlynningar á Landspítalann Háskólasjúkrahús og einn á Heilbrigðisstofnun Suðurnesja en ekki var um alvarleg meiðsl að ræða.

 

Slysið gerðist með þeim hætti að ekið var utan í kyrrstæðan bíl á leið austur tvöfalda Reykjanesbraut. Ökumaður þeirrar bifreiðar stóð utan við bíl sinn þegar atvikið átti sér stað og fékk bílinn á sig.

 

Mikill viðbúnaður var vegna slyssins og var Brautin lokuð í um klukkutíma og beint um Vatnsleysuströnd á meðan.

 

VF-Mynd/Þorgils