Fjölnota knattspyrnuhús vígt í Grindavík

Nýtt fjölnota knattspyrnuhús sem fengið hefur nafnið Hópið - var formlega tekið í notkun í dag í Grindavík. Sigfús B. Ingvason, prestur og knattspyrnuáhugamaður úr Keflavík blessaði húsið og sparkaði síðan bolta upp í loftið við fögnuð heimamanna úr Grindavík en forseti bæjarstjórnar, Garðar Páll Vignisson tók vígsluspark á vítalínunni sem hann skoraði örugglega úr enda enginn í markinu.

Fjölnota knattspyrnuhúsið var tekið í notkun haustið 2008 en formlega vígsla var í dag. Það er 50 x 70 metra stálgrindarhús með nýjustu kynslóð gervigrass og 60 metra hlaupabraut. Byggingafyrirtækið Grindin úr Grindavík byggði húsið og afhenti fulltrúi fyrirtækisins forseta bæjarstjórnar lyklavöldin sem síðan kynnti nafn hússins.

Við vígsluna í dag sýndu ungir  knattspyrnumenn snilli sína en auk þeirra stangveiðimenn, kylfingar og eldri borgarar, með fluguköstum, golfhöggum og leikfimisæfingum.

Eysteinn Húni Hauksson, yfirþjálfari yngri flokka Grindavíkur var auðvitað í skýjunum við þessi tímamót og sagði að tilkoma nýja hússins væri bylting fyrir knattspyrnufólk í bæjarfélaginu. Mikill knattspyrnuáhugi er í bænum og tugir ungra krakka eru á æfingum hjá UMFG. Fleiri aðilar sem hafa notað húsið og eru ánægðir, meðal annars stangveiðimenn en þeir hafa æft fluguköstin af kappi í vetur á gerfigrasinu og í hlýjunni innan veggja nýja hússins.