Fjölmenni við útför Alberts Sanders

Útför Alberts Karls Sanders fór fram frá Ytri-Njarðvíkurkirkju í dag. Mikið fjölmenni var við útförina og meðal gesta voru Forseti Íslands hr. Ólafur Ragnar Grímsson, Davíð Oddsson forsætisráðherra, Árni Mathiesen sjávarútvegsráðherra og Matthías Á. Mathiesen fyrrverandi ráðherra.
Albert Karl Sanders fæddist á Ísafirði 20. mars 1929. Hann varð bráðkvaddur að morgni 3. apríl síðastliðinn. Foreldrar hans voru Karl Sanders stýrimaður frá Noregi og Jónína Albertsdóttir húsmóðir á Ísafirði. Hálfsystkini Alberts sammæðra eru Kristján Lyngmó, Guðný Anna Jónasdóttir og Margrét Kristín Jónasdóttir. Albert ólst að mestu upp hjá móður sinni og ömmu, Magneu Guðnýju Magnúsdóttur, í Albertshúsi í Sundstræti 33 á Ísafirði. Einnig ólst hann að nokkru leyti upp hjá móðursystur sinni, Margréti, og eiginmanni hennar, Ólafi Gunnarssyni. Albert kvæntist 9. janúar 1955 Sigríði Friðbertsdóttur frá Suðureyri. Foreldrar hennar voru Jóna Magnúsdóttir og Friðbert G. Guðmundsson. Börn Alberts og Sigríðar eru: 1) Friðbert, f. 2. júní 1954, fulltrúi á Keflavíkurflugvelli, maki Linda María Runólfsdóttir. Þeirra börn eru Runólfur Þór, Anna María og Sigríður Eva. 2) Jónína, f. 23. desember 1955, starfsmannastjóri hjá Eimskip, maki Þorbergur Karlsson. Sonur Jónínu er Albert Haukur Ólafsson og synir Þorbergs eru Magnús Þór og Karl Ágúst. 3) Margrét Ólöf, f. 13. október 1959, framkvæmdastjóri hjá Deloitte & Touche, maki Sigurður Guðnason. Þeirra börn eru Albert Karl og Sigríður. Dóttir Sigurðar er Sylvía Rós. 4) Karl, f. 24. ágúst 1962, slökkviliðsmaður á Keflavíkurflugvelli. Fyrrverandi eiginkona Karls er Nicolette Prince. Sonur þeirra er Friðbert Karl og dætur Nicolette, Latoya, Fabiola og Queene. 5) Hörður, f. 16. september 1964, rafverktaki á Keflavíkurflugvelli, maki Sonja Hermannsdóttir. Þeirra börn eru Bryndís Dögg og Hermann Ingi. Dóttir Sonju og uppeldisdóttir Harðar er Margrét Lára. 6) Birgir, f. 13. janúar 1967, verslunarmaður á Akureyri. Sambýliskona Rakel Ósk Þórðardóttir.

Albert lauk gagnfræðaprófi og síðar sveinsprófi í rafvirkjun árið 1951. Hann vann við rafvirkjun á Ísafirði í nokkur ár en síðar var hann gjaldkeri hjá Togarafélaginu á sama stað um tíu ára skeið. Árið 1962 fluttu Albert og Sigríður með fjölskylduna til Njarðvíkur og þar starfaði hann fyrst við skrifstofustörf og síðar við rafvirkjun á Keflavíkurflugvelli. Hann var bæjarstjóri í Njarðvík frá 1974 til 1986 og veitustjóri hjá varnarliðinu frá þeim tíma til ársins 1999.

Albert Karl var frá ungaaldri sjálfstæðismaður og starfaði mikið innan Sjálfstæðisflokksins. Hann gegndi mörgum trúnaðarstöfum fyrir flokkinn og var meðal annars varabæjarfulltrúi á Ísafirði 1954-1962, formaður Sjálfstæðisfélagsins á Ísafirði, fulltrúaráðs sjálfstæðisfélaganna í Njarðvík um árabil og varaformaður kjördæmisráðs sjálfstæðisfélaganna á Reykjanesi. Albert átti sæti í stjórn Sjúkrahúss Keflavíkurlæknishéraðs og var formaður Heilsugæslustöðvar Suðurnesja um árabil. Hann tók þátt í stofnun Hitaveitu Suðurnesja og átti sæti í stjórn fyrirtækisins og var formaður stjórnar um skeið. Hann átti einnig sæti í stjórnum fjölmargra annarra stofnana á Suðurnesjum og var formaður þeirra um skeið og eru helstar nefndar stjórnir Sambands sveitarfélaga á Suðurnesjum, Dvalarheimilis aldraðra á Suðurnesjum, Landssambands sjúkrahúsa, Brunavarna Suðurnesja, Landshafnar Keflavíkur og Njarðvíkur.

Á yngri árum tók Albert þátt í skátastarfi og stundaði íþróttir, aðallega knattspyrnu en einnig frjálsar íþróttir og skíði. Hann var mjög virkur í starfi íþróttahreyfingarinnar og var m.a. formaður Skíðaráðs Ísafjarðar og knattspyrnufélagsins Harðar. Hann þjálfaði knattpyrnumenn á Suðurnesjum í nokkur ár. Knattspyrnusamband Íslands heiðraði hann fyrir störf í þágu íþróttarinnar.

Hann tók virkan þátt í starfi leikfélaga bæði á Ísafirði og í Keflavík og lék í mörgum leikritum. Albert starfaði í fjölmörgum félögum á Suðurnesjum og má þar nefna Lionsklúbb Njarðvíkur og Oddfellow-regluna. Hann var formaður Rafiðnaðarfélags Suðurnesja og fulltrúi þess við stofnun Rafiðnaðarsambands Íslands og sat í stjórn sambandsins um árabil.