Fjárhagsáætlun Reykjanesbæjar: 160 milljónir í hagnað

Tekju- og gjaldaáætlun fjárhagsáætlunar Reykjanesbæjar fyrir næsta ár, sem kynnt var í bæjarráði í gær, gerir ráð fyrir 155 milljón kr. rekstrarafgangi. Áætlunin verður lögð til fyrri umræðu þann 6. desember n.k.

Reykjanesbær mun einnig skila um 160 milljón kr. jákvæðri rekstrarniðurstöðu fyrir árið 2005, samkvæmt nýendurskoðaðri fjárhagsáætlun Reykjanesbæjar. Veltufé frá rekstri er jákvætt um 73 milljónir kr.

Þetta er mikill viðsnúningur frá árinu 2004 þegar stórframkvæmdir við endurnýjun Hafnargötu á fjórða hundrað milljón kr. voru að mestu gjaldfærðar á rekstur og gangskör var gerð í endurreikningi lífeyrisskuldbindinga sem einnig var fært á rekstur. Árið 2004 var því rekstrarniðurstaða neikvæð um 210 milljónir kr.

Vegna jákvæðrar rekstrarniðurstöðu þessa og næsta árs telja bæjaryfirvöld svigrúm til skattalækkana og aukinnar þjónustu við barnafólk í Reykjanesbæ sem tekin verður afstaða til við fjárhagsáætlunargerð ársins 2006.

Í frétt á heimasíðu bæjarins kemur fram að margvísleg þjónusta sé nú í bænum umfram það sem gerist hjá stærstu sveitarfélögunum á landinu: Engir biðlistar eru á leikskóla í Reykjanesbæ, frítt er í strætisvagna, gjald fyrir hádegismáltíðir í grunnskólum er lægst í Reykjanesbæ, frítt er í forskóla tónlistar fyrir öll börn fyrstu 2 árin. Þá er gjald í Frístundaskóla að loknum grunnskóladegi lægst í Reykjanesbæ, þrátt fyrir að gjald fyrir íþróttaæfingar sé innifalið í verði.

Í umræðu um málið á bæjarstjórnarfundi á þriðjudag gerði Kjartan Már Kjartansson, fulltrúi Framsóknarmanna, gerði athugasemdir við færslur í ársreikningunum. Hann telur að leigugreiðslur bæjarins vegna opinberra bygginga flokkist sem fjármögnunarleigusamningur en ekki sem rekstarleiga og skuli því færðir í efnahagsreikning bæjarins.

Hann taldi til þrjú atriði í reglum um leigusamninga í bókhaldi og reikningsskilum sveitarfélaga sem sýndu það að um fjármögnunarleigusaming sé að ræða.

Í samtali við Víkurfréttir fagnaði Kjartan því að meirihlutinn ætlaði að skoða þessi mál betur og vonaði að þessar tölur myndu rata rétta leið til að sjá stöðuna eins og hún er. „Þetta snýst ekki um að draga upp einhverja vonda mynd af ástandinu, heldur að allir geti séð raunverulega mynd af stöðunni,“ sagði hann að lokum.

Böðvar Jónsson, formaður bæjarráðs, sagði í viðtali við Víkurfréttir að hann væri alls ekki sammála Kjartani.
Þessi aðferð sé í fullu samræmi við alþjóðlegar reglur um reikningsskil og sagði hann að atriðin sem Kjartan týndi til ættu ekki við í þessu tilfelli.
Eitt atriðið sem talið var upp sagði að um fjármögnunarleigusaming væri að ræða ef leigða eignin væri svo sérhæfð að aðeins leigutaki gæti notað hana á mikilla breytinga. Benti Kjartan á grunnskólahús og sundlaugar í því samhengi.

Böðvar sagði að t.d. gætu aðrir aðilar mögulega nýtt skólahúsnæði undir einkaskóla, eða skrifstofurekstur þegar fram í sækir, en annars væri ómögulegt að segja til um slíkt þar sem húsin myndu standa í áratugi í viðbót.

Böðvar sagði að þeir færu í einu og öllu eftir þeim reglum sem gilda um reikningsskil. „Þetta er allt eftir settum reglum og samkvæmt okkar endurskoðendum, sem fara eftir þeim lögum og reglum sem eru í gildi fyrir sveitarfélögin.“