Fimmtungs aukning farþega um Keflavíkurflugvöll
Á fyrri helmingi ársins fjölgaði farþegum á Keflavíkurflugvelli um nærri fimmtung. Það er miklu meiri aukning en stóru flugvellirnir á Norðurlöndunum geta státað af. Turisti.is greinir frá.
Það fóru rúmlega ellefu milljónir farþega um Kaupmannahafnarflugvöll á fyrri helmingi ársins. Það er um tíu sinnum fleiri farþegar en flugu til og frá Keflavík á sama tíma
Sá danski er vinsælasti flugvöllur Norðurlanda en Gardermoen í Osló kemur rétt á eftir eins og sjá má töflunni hér fyrir neðan. Arlanda í Stokkhólmi er í þriðja sæti og Vantaa í Helsinki er í því fjórða.
Á síðasta ári var Keflavíkurflugvöllur sá níundi stærsti á Norðurlöndum en í samanburði við þá fjóru stærstu þá hefur farþegum hlutfallslega fjölgað langmest hér það sem af er ári.
Fjöldi farþega á fyrri helmingi ársins.
| Flugvöllur | Fjöldi farþega | Breyting milli ára |
| Kaupmannahöfn | 11.514.594 | +2,2% |
| Gardermoen Osló | 11.004.653 | +3,2% |
| Arlanda Stokkhólmi | 9.891.293 | +2% |
| Vantaa Helsinki | 7.456.331 | -0,3% |
| Keflavíkurflugvöllur | 1.153.139 | +18,4% |
Hinir norrænu vellirnir sinna einnig innanlandsflugi og í Osló var t.a.m. um helmingur af farþegunum á leið til annarra áfangastaða í Noregi.
