FFGÍR með átak í hjálmanotkun

FFGÍR, Foreldrafélög og Foreldraráð Grunnskóla í Reykjanesbæ, stendur nú fyrir átaki í Reykjanesbæ fyrir notkun hjálma og annara öryggistækja, þar sem allt of algengt er að börn séu á reiðhjólum, línuskautum o.s.frv. án hjálma.

Á heimasíðu sinni bendir FFGÍR á nokkur atriði um hvernig hægt er að auðvelda foreldrum að fá börn sín til að nota hjólreiðahjálm:

-Mikilvægt er að byrja snemma að venja barnið á að nota hjálm t.d. um leið og barnið fer að nota þríhjól.

-Leyfið barninu að koma með þegar hjálmurinn er keyptur. Þannig getur það valið hjálm sem það langar í.

-Mikilvægt er að máta hjólreiðahjálminn í versluninni áður en að hann er keyptur og að kaupa hjálm sem auðvelt er að stilla rétt og situr þægilega á höfði barnsins. Hjálmur sem ekki er rétt stilltur og passar illa á barnið er ekki jafn öruggur.

-Útskýrið fyrir barninu hvers vegna svo mikilvægt er að nota hjálm við hjólreiðar.

-Hrósið barninu fyrir að nota hjálminn rétt.

-Verið ÁKVEÐIN, ekki gefa barninu það eftir að nota ekki hjálminn.

-Verið góð fyrirmynd og notið alltaf hjálm þegar þið hjólið eða eruð á línuskautum.

-Einnig er mikilvægt að brýna fyrir börnum að nota olnboga-, úlnliðs- og hnéhlífar með hjálminum þegar þau eru á línuskautum, skautum, hjólabrettum og hlaupahjólum.

Að lokum er bent á nauðsyn þess að allir foreldrar ræði við börn sín um það öryggi að nota hjálm og önnur öryggistæki, fylgi eftir umferðarlögum um hjálmnotkun og gangi fram með góðu fordæmi.