„Fengum ósýnilegt faðmlag“
- segir björgunarsveitarmaðurinn Haraldur Haraldsson
Samtals tóku 90 björgunarsveitarmenn af Suðurnesjum og höfuðborgarsvæðinu þátt í leit að karlmanni í Reykjanesbæ að kvöldi jóladags. Það var á tíunda tímanum að kvöldi jóladags sem lögreglan kallaði út björgunarsveitir til aðstoðar við leit í Reykjanesbæ að karlmanni sem óttast var að gæti orðið úti.
Björgunarsveitin Suðurnes í Reykjanesbæ var fjölmenn í leitinni og með marga leitarhópa. Einn þeirra var stoppaður af konu í bænum sem vildi færa björgunarfólkinu konfektdós.
Að sjálfsögðu tók björgunarfólkið við konfektinu. „Við fengum ósýnilegt faðmlag,“ sagði Haraldur Haraldsson björgunarsveitarmaður í samtali við Víkurfréttir.
