Faldi amfetamínið í skónum

Pólskur karlmaður var tekinn af tollvörðum í Leifsstöð í gær með um eitt kíló af amfetamíni, sem falið var í þykkbotna skóm. Hann hefur verið úrskurðaður í tveggja vikna gæsluvarðhald.

Það var seint í gærkvöld að tollverðir í Leifsstöð stöðvuðu pólskan mann, líklega í kringum þrítugt. Hann mun hafa komið hingað frá Kaupmannahöfn. Eftirgrennslan tollvarða leiddi í ljós að í þykkbotna skóm, sem maðurinn klæddist, var falið töluvert af amfetamíni.

Óvíst er hvort yfirvöldum hérlendis barst ábending að utan, um að maðurinn hyggðist smygla hingað eiturlyfjum, eða hvort tollverðir tóku manninn við reglubundið eftirlit. Lögregla hefur tekið við málinu.

Maðurinn hefur verið í yfirheyrslum, eftir því sem heimildir fréttastofu herma. Hann var úrskurður í tveggja vikna gæsluvarðhald í Héraðsdómi Reykjaness í dag.

Heimild: www.visir.is