Fagnar hugmyndum um ókeypis námsgögn

Fræðsluráð Reykjanesbæjar lagði til á síðasta fundi sínum að öllum grunnskólabörnum í bæjarfélaginu yrði veitt ókeypis námsgögn frá og með næsta hausti. Bæjarstjórn Reykjanesbæjar fjallaði um fundargerð ráðsins á fundi sínum í vikunni. Í máli Friðjóns Einarssonar, formanns bæjarráðs, kom fram að hann tæki undir tillögu fræðsluráðsins enda hefði stuðningur við fjölskyldufólk verið eitt af þeim málum sem voru í málefnasamningi meirihlutans. „Ég fagna þessari tillögu fræðsluráðs og veit að bæjarráð tekur vel í hugmyndina þegar henni verður vísað þangað,“ sagði hann.

Bæjarstjórn samþykkti einróma að vísa tillögu fræðsluráðs til bæjarráðs.