Eygló stefnir á 1. sæti í Suðurkjördæmi

Eygló Harðardóttir hefur ákveðið að gefa kost á sér í fyrsta sæti lista Framsóknarflokksins í Suðurkjördæmi í komandi alþingiskosningum. Eygló tók sæti á Alþingi í nóvember síðastliðnum eftir að hafa verið varaþingmaður síðan 2003. „Á síðasta flokksþingi Framsóknarflokksins hlaut ég afgerandi stuðning til forystu í flokknum og býð mig því fram til að leiða lista Framsóknarflokksins í Suðurkjördæmi,“ segir hún í tilkynningu til fjölmiðla.

Gríðarlega stór verkefni eru framundan við að verja heimilin og fyrirtækin í landinu svo halda megi uppi því velferðarríki sem Framsóknarflokkurinn hefur átt þátt í að byggja. Hugmyndafræði framsóknarmanna um samvinnu, samstöðu og sanngirni verður lykilþáttur í úrlausn þeirra. Þessari hugmyndafræði hef ég haldið á lofti í mínu stjórnmálastarfi hingað til og mun gera áfram sem leiðtogi framsóknarmanna í Suðurkjördæmi, segir Eygló Harðardóttir alþingismaður og ritari Framsóknarflokksins.