Enn leitað að kajakræðurunum

Ekkert hefur enn spurst til kajakræðaranna tveggja sem leitað hefur verið að síðan í gær. Hátt á annað hundrað menn úr 20 björgunarsveitun, skip og bátar frá Slysavarnafélaginu Landsbjörgu og þyrla Landhelgisgæslunnar hafa frá því snemma í gærkvöldi leitað fólksins, sem hélt frá Garðskaga á laugardagsmorgun og ætluði til Snæfellsness.

Leitin hefur beinst að vestanverðu Nesinu og allt norður að Bjargtöngum, samkvæmt vísbendingum frá erlendu símafyrirtæki sem segir að kveikt hafi verið á gervihnattasíma fólksins klukkan fjögur í gær og aftur klukkan níu í gærkvöldi, án þess þó að hringt hafi verið úr honum. Gengnar hafa verið fjörur á stóru svæði og leitað á bátum undan ströndum.

Leitin verður endurskipulögð þegar líður á morguninn, enda margir björgunarmenn orðnir þreyttir. Þá verður Fokker Landhelgisgæslunnar sendur til leitar og varðskip sent á leitarsvæðið. Ekkert hefur spurst til fólksins eftir að það lagði af stað, en það er vant svona siglingum og vel búið.