Engin slys á fólki en mikið eignatjón í stórbruna

Mikill eldur kom upp í íbúðarhúsi við Hlíðargötu í Sandgerði á þriðja tímanum í dag. Allt tiltækt slökkvilið Brunavarna Suðurnesja var kallað út vegna brunans. Engin slys urðu á fólki en eignatjón er mikið.

 

Enginn var heima í húsinu þegar eldurinn kom upp. Vitni lýsa því að sprenging hafi heyrst og í sömu mund hafi eldurinn breiðst út og mikinn reyk lagt frá húsinu.

 

Þegar slökkvilið kom á vettvang logaði mikill eldur við gafl hússins og einnig hafið komist eldur í þak.

 

Slökkviliðsmenn réðust strax til atlögu við eldinn, bæði við húsgaflinn og með því að rjúfa þakið á húsinu, sem er timburhús.

 

Slökkvistarfi var að mestu lokið um kl. 16 eða einum og hálfum tíma eftir að útkall barst. Slökkviliðsmenn og lögregla eru þó enn á vettvangi, enda geta leynst glæður í húsinu.

 

Eldsupptök eru óljós. Húsráðandi sagði að við gafl hússins, þar sem talið er að eldurinn hafi komið upp, hafi verið skápur sem í hafi verið dós með viðarvörn og einnig bensínbrúsi. Grill og gaskútur voru ekki á þeim stað þar sem eldurinn virðist hafa komið upp. 

 

Tæknideild lögreglu mun fara með rannsókn brunans.

Eldurinn komst meðal annars í þak hússins og þurfti að rjúfa það á nokkrum stöðum til að ná til eldsins.