Engin alvarleg slys í hörðum árekstri

Betur fór en á horfðist þegar pallbíll og lítill jeppi skullu saman í hörðum árekstri á gatnamótum Grænáss og Reykjanesbrautar skömmu eftir hádegi í dag.

Tveir voru í hvorum bílnum, en allir sluppu án teljandi meiðsla. Tveir fóru að vísu á Heilbrigðisstofnun Suðurnesja til nánari skoðunar, en fengu að fara heim að henni lokinni.

Bílarnir eru mikið skemmdir, jafnvel ónýtir og sagði lögreglumaður sem kom á vettvang að farþegar mættu teljast heppnir að svo vel fór.