Eldur í feitipottum: Eldavélar á Keflavíkurflugvelli hitna hraðar

Slökkvilið Brunavarna Suðurnesja hefur fengið fjögur útköll vegna þess að eldur hefur komið upp í feitipottum í háskólabyggðinni á Keflavíkurflugvelli frá því í haust. Sigmundur Eyþórsson, slökkviliðsstjóri BS sagði í samtali við Víkurfréttir að eldavélar á gamla varnarsvæðinu hitni hraðar og meira en þær sem Íslendingar eigi að venjast.

Eldavélarnar í nemendaíbúðunum eru með svokölluðum gormahellum, sem hætt var að nota á Íslandi fyrir mörgum árum af einhverjum ástæðum. Þessar hellur hitna hraðar við lægri spennu, sem er í íbúðunum á svæðinu. Sigmundur sagði að íbúar á háskólasvæðinu hafi fengið fræðslu um meðferð vélanna og einnig séu eldvarnarteppi í öllum íbúðum. Þrátt fyrir þetta hafi fjórum sinnum komið upp eldur í pottum á gamla varnarsvæðinu frá því Íslendingar fóru að flytja þangað inn í haust.

Í öllum tilvikum er um að ræða minniháttar tjón.