Eldur í bíl við Bláa lónið

Á sunnudagskvöld var Lögreglunni í Keflavík tilkynnt um eld í fólksbifreið á Grindavíkurvegi móts við Bláa Lónið. Olía hafði lekið úr bifreiðinni og eldur blossað upp undir vélarhlífina. Vegfarandi sem átti leið hjá var með slökkvitæki í bifreið sinni og slökkti hann eldinn. Slökkviliðsbifreið frá Grindavík kom á staðinn og voru slökkviliðsmenn búnir að tryggja örugglega að ekki leyndist eldur í bifreiðinni.
Fimm umferðaróhöpp voru um helgina á Suðurnesjum samkvæmt dagbók Lögreglunnar í Keflavík.

Dagbók lögreglu

Föstudagurinn 14. mars 2003

Kl. 16:03 var tilkynnt um harðan árekstur milli bifreiða á Iðavöllum í Keflavík. Ökumenn beggja bifreiðanna voru fluttir í sjúkrabifreið á Heilbrigðisstofnun Suðurnesja til skoðunar en meiðsl þeirra voru talin minniháttar. Báðar bifreiðarnar urðu óökufærar og voru fluttar burtu með kranabifreið.

kl. 18:42 var tilkynnt að bifreið hafi verið ekið á ljósastaur við Reykanesbraut á Fitjum. Ökumaður bifreiðarinnar meiddist minniháttar og var fluttur á Heilbrigðisstofnun Suðurnesja til skoðunar. Hægra afturhorn bifreiðarinnar hafði rekist í staurinn og fór bifreiðin þvert yfir gagnstæða akrein Reykjanesbrautarinnar og endaði utan vegar.

Eigandi eins ökutækis var kærður fyrir að mæta ekki með bifreið sína til aðalskoðunar á tilsettum tíma.



Laugardagurinn 15. mars 2003

Kl. 05:12 var tilkynnt um innbrot og þjófnað úr hvítri jeppabifreið þar sem hún stóð á bifreiðastæði við Grófina 8, Keflavík (Casino). Úr bifreiðinni var stolið tveimur hátölurum, magnara og grænni úlpu.

Kl. 14:25 fékk lögreglan tilkynningu um að bifreið hafi verið ekið útaf Nesvegi, vestan við Grindavík. Bifreiðin var tekin burtu með kranabifreið. Engin slys á fólki.

Kl. 14:45 var tilkynnt um umferðaróhapp á gatnamótum Hafnargötu og Tjarnargötu í Keflavík. Engin slys urðu á fólki.

Sunnudagurinn 16. mars 2003

Kl. 12:30 var tilkynnt um umferðaróhapp á gatnamótum Reykjanesbrautar og Stekks í Njarðvík. Engin slys urðu á fólki.

Kl. 21:01 var tilkynnt um eld í fólksbifreið á Grindavíkurvegi móts við Bláa Lónið. Olía hafði lekið úr bifreiðinni og eldur blossað upp undir vélarhlífina. Vegfarandi sem átti leið hjá var með slökkvitæki í bifreið sinni og slökkti hann eldinn. Slökkviliðsbifreið frá Grindavík kom á staðinn og voru slökkviliðsmenn búnir að tryggja örugglega að ekki leyndist eldur í bifreiðinni.