Eldsvoði í Heiðarbóli af völdum flugelda

Flugeldur kveikti talsverðan eld við íbúðarhús í Heiðarbóli í Keflavík um miðnætti í kvöld, gamlárskvöld. Flugeldurinn hrapaði í heitan pott við íbúðarhúsið og kveikti í ábreiðu yfir pottinum og pottinum sjálfum. Þaðan barst eldurinn upp í þakskegg og sprengdi rúður.

 

Nágrannar sáu hvað gerðist og hófu slökkvistarf áður en slökkvilið Brunavarna Suðurnesja kom á vettvang.

 

Talsverður eldur logaði þegar slökkviliðið kom á vettvang en útkallið barst slökkviliðinu þegar klukkuna vantaði fjórar mínútur í miðnætti.

 

Ljósmyndari Víkurfrétta tók myndina hér að ofan með flygildi. Þegar myndin var tekin var ljósmyndaranum ekki ljóst að þarna logaði eldur, enda mikil ljósadýrð á himni þar sem flugeldar sprungu. 

 

Hringur hefur verið dreginn um staðinn þar sem brennur og reykur stígur til himins.