Ekki unnt að draga neinar hækkanir til baka í Grindavík

Verkalýsfélags Grindavíkur hefur sent bæjaryfirvöldum kröfu um að Grindavík “axli sína ábyrgð á því að markmið um lækkun verðbólgu og kaupmátt launa nái fram að ganga”. Bréfið var lagt fram á síðasta fundi bæjarráðs. Bæjarstjóri lagði fram samanburð á lóðamati og lóðarleigu áranna 2001 og 2002 sem fjármálastjóri hefur tekið saman. Vísað er til fundargerðar 06.02.02 – liður 16. 

Meirihluti D og B lista lagði fram svohljóðandi tillögu:
Grindavíkurbæ hefur borist krafa frá tveimur verkalýðsfélögum um að Grindavík axli ábyrgð með öðrum í þjóðfélaginu af því að viðhalda kaupmætti og halda niðri verðbólgu.  Samband  ísl.sveitarfélaga hefur reiknað út að hlutdeild sveitarfélaganna í landinu í vísitölu neysluverðs sé 5,61 %. Hluti sveitarfélaganna í 9,4% hækkun vísitölunnar s.l. 12 mánuði er því 0,284 prósentustig.
Ennfremur vill bæjarráð minna á að gjaldskrár hjá bænum hafa ekki tekið hækkunum, því er ekki unnt að draga neinar hækkanir til baka.  Einnig er minnt á að Grindavíkurbær hefur ekki hækkað útsvarsprósentu svo sem tillögur tekjustofnanefndar gerðu ráð fyrir. Bæjarráð minnir á að álagningarprósenta fasteignaskatts hefur þegar verið lækkuð um 6% sem er meira en  sem svarar þeim breytingum sem leiddu af kerfisbreytingu hjá Fasteignamati ríkisins á s.l. sumri.  Álagningarprósenta lóðarleigu var af sama tilefni lækkuð um 22 %.  Samtals þýða þessar lækkanir tekjutap fyrir bæinn að fjárhæð 8.2 milljónir króna.   Til þess að koma ennfrekar til móts við íbúðareigendur í Grindavík leggur bæjarráð til við bæjarstjórn að veittur verði 25 % afsláttur af álagðri lóðarleigu á íbúðarhúsnæði á lóðum í eigu Grindavíkurbæjar. Bæjarstjóra verði falið að gera tillögu að framkvæmd málsins og leggja fyrir bæjarráð. Með þessum aðgerðum  telja flutningsmenn að færð hafi verið til baka til íbúanna sú hækkun lóðarleigu er leiddi af kerfisbreytingum hjá Fasteignamati ríkisins s.l. sumar.

Fulltrúi minnihlutans lagði fram svohljóðandi tillögu:
Ég undirritaður fulltrúi Samfylkingarfélags Grindavíkurlistans legg til að lóðarleigugjöld á íbúðarhús verði lækkuð sem nemur hækkun á mati lóðar. Og minni á að við álagningu í desember var ekki stefnt að hækkun eins og sjá má m.a. á bókun Grindavíkurlistans.

Hörður Guðbrandsson (sign.)

Tillaga D og B-lista var samþykkt, Hörður situr hjá.

Greinargerð frá fundi bæjarstjórnar Grindavíkur í gær:

Það hefur ekki farið framhjá neinum að nú er í gangi átak hjá öllum aðilum hvað varðar "Rauðu strikin" svokölluðu. 
Grindavíkurbæ hefur borist krafa frá tveimur verkalýðsfélögum um að Grindavík axli ábyrgð með öðrum í þjóðfélaginu af því að viðhalda kaupmætti og halda niðri verðbólgu. Flest bæjarfélög hafa tekið til baka sínar hækkanir en í Grindavík er einungis hækkun á einum þætti og er sú til komin vegna þeirra breytinga sem urðu á matinu hjá Fasteignamati ríkisins. Í almennri umræðu á bæjarstjórnarfundum hefur það komið fram að bæjarfulltrúar ætluðu sér ekki að hafa bæjarbúa að féþúfu með því að hækka fasteignaskattana en lækka heldur á móti prósentuna þannig að fólk væri að borga svipað og á síðasta ári. 
Nú kemur í ljós að flestir ef ekki allir eru að borga verulega meira en í fyrra. Meðaltalshækkun á lóðarleigu er 156% samkvæmt þeim upplýsingum sem fram komu á bæjarráðsfundi 13.febrúar. Mjög margir eru að borga 20-30% meira en í fyrra í heildargjöldunum sínum sem í daglegu tali kallast fasteignaskattar.
Það vekur því nokkra athygli sú tillaga sem samþykkt var á bæjarráðsfundi 13.febrúar með atkvæðum meirihlutans. Á sama fundi telst meirihlutanum til að þeir séu að jafna út þá hækkun sem orðið hefur á lóðarleigu hjá Grindvíkingum sem er verulega langt frá sannleika málsins. 
Staðreyndirnar eru að lóðarleiguprósentan var árið 2001 1,8% en lækkaði í 1,4% fyrir þetta ár til að vega upp á móti breytingum á fasteignamati. Til þess að þetta skiljist er hér dæmi um hús hér í bænum sem borgað var af árið 2001 kr. 71.188 en árið 2002 samkvæmt útsendum álagningaseðlum 91.539 kr. Ef tekið er tillit til þeirrar 25% lækkunar á lóðarleigu til viðbótar er ljóst að sú prósenta lækkar úr 1,4% í 1,05% sem þýðir að áðurnefndur húseigandi borgar eftir sem áður 86.678 kr. sem er hækkun upp á 21,76% á álagningu fasteignagjalda og lóðarleigan á milli ára hækkar um 75,76% . Til að koma í veg fyrir allan misskilning er hér hús sem er fyrir neðan upphaflega meðaltalið á lóðarleiguhækkun sem var 156% en þessi húseigandi átti að fá frá meirihlutanum 134% hækkun fyrir svokallað lóðarleigulækkun. Þetta eru staðreyndirnar um hækkanir meirihlutans en kannski var þarna prentvilla hjá meirihlutanum í stað lækkun átti að standa hækkun?

Tillaga Grindavíkurlistans:
Við undirritaðir bæjarfulltrúar Grindavíkurlistans leggjum til að bæjarstjóra verði falið að finna leiðir til að lækka fasteignaskatta íbúanna þannig að þeir borgi svipaða krónutölu í gjöld og árið 2001. 
Garðar Vignisson
Pálmi Ingólfsson 
Hörður Guðbrandsson

Tillagan er felld með 4 atkv. gegn 3.

Bókun frá B og D lista:
Með vísan til bókunar J-listans vill meirihluti B- og D-lista ítreka bókanir frá bæjarráðsfundum 6. og 13. febrúar og minnir á að tilgangurinn var að færa til baka hækkanir sem leiddu af kerfisbreytingu hjá Fasteignamati ríkisins en ekki að lækka tekjur bæjarins að raungildi og það teljum við að hafi tekist.
Meirihluti B- og D-lista.

Tillaga frá B og D lista Samþykkt með 4 atkv. gegn 3.