Ekki hægt að útiloka fleiri uppsagnir

Forsvarsmenn Keflavíkurverktaka héldu fund með starfsmönnum fyrirtækisins á Keflavíkurflugvelli í dag kl. 11:00 í tengslum við fjöldauppsagnirnar sem eru þar á bæ. Ástæða fundarins var að útskýra fyrir starfsmönnum þess hvers vegna þessar uppsagnir væru nauðsynlegar. Róbert Trausti Árnason, forstjóri Keflavíkurverktaka, sagði á fundinum að það væri margt sem spilaði inn í en helsta ástæðan væri sú að þeir væru einfaldlega ekki samkeppnishæfir á Keflavíkurflugvelli þar sem lítið væri um verkefni og þeir hefðu ekki fengið úthlutað því sem þeim hefði verið lofað. Róbert benti hins vegar á að ýmsir möguleikar væru fyrir hendi á höfuðborgarsvæðinu sem og annars staðar á landinu en það væri þó óhjákvæmilegt að sleppa því segja mönnum upp.
Í lok fundarins gaf Róbert starfsmönnum tækifæri á því að spyrja fulltrúa fyrirtækisins spurninga, ef það væri eitthvað sem væri óljóst. Þar var Róbert Trausti m.a. spurður hvort starfsmenn fyrirtækisins mættu eiga von á fleiri uppsögnum. Sagðist Róbert ekki eiga von á því en ekki væri þó hægt að útiloka það. Aðspurður eftir hverju hefði verið farið þegar mönnum væri sagt upp, t.d. hvort farið væri eftir starfsaldri sagði hann að þarfir fyrirtækisins hefðu verið metnar gaumgæfilega og farið eftir grundvelli þess. Róbert sagðist ekki hafa neinar skýringar á því hvers vegna öll verkefni færu til eins fyrirtækis, en þar átti hann við ÍAV, og sagðis hann sjálfur hafa leitað eftir svörum, bæði hjá Bandaríkjaher og Ráðuneytinu en þar hefði hver vísað á annan. Það verða því 72 starfsmenn Keflavíkurverktaka sem fá uppsagnarbréf í póstinum í dag og þurfa að fara að leita sér að nýrri vinnu.