Ekkert sumarfrí í Reykjanesbæ: Nýr meirihluti kynnir aðgerðaáætlun fyrir fyrstu 100 dagana

Nýr meirihluti Sjálfstæðisflokksins og Miðflokksins í Reykjanesbæ ætlar ekki að liggja á liðinu á fyrstu mánuðum sínum við stjórnvölinn. Í tilkynningu frá flokkunum er kynntur metnaðarfullur og viðamikill verkefnalisti fyrir fyrstu 100 daga meirihlutans, en honum er ætlað að leggja grunninn að nýju sóknarskeiði í sveitarfélaginu, eins og greint er frá í tilkynningunni.

Aðeins fjórir dagar eru liðnir síðan nýi meirihlutinn tók formlega við völdum. Í tilkynningunni, sem er undirrituð af Vilhjálmi Árnasyni, nýjum bæjarstjóra, og Gunnlaugi Kárasyni, formanni bæjarráðs, kemur fram að bæjarbúar muni fá reglulegar upplýsingar um framgang mála. Tekið er fram að listinn yfir verkefnin sé ekki tæmandi en ljóst er að breytinga er að vænta á mörgum sviðum.

Tvö fyrstu verkefnin þegar í höfn

Þótt stutt sé um liðið frá valdaskiptunum hefur nýi meirihlutinn þegar lokið við tvö fyrstu markmið sín. Annars vegar hefur verið látið flagga íslenska fánanum við ráðhús sveitarfélagsins og hins vegar hefur verið tekin ákvörðun um að fresta áformum um blokkabyggð á hinu svokallaða Akademíureiti.

Harðari stefna í útlendingamálum og endurskipulagning fjármála

Meðal stærstu tíðindanna á 100 daga listanum eru áform er lúta að móttöku flóttamanna og fjármálum bæjarins. Meirihlutinn ætlar að gera ríkisvaldinu það fyllilega ljóst að ekki verði undirritaðir nýir samningar um móttöku nýrra flóttamanna í Reykjanesbæ.

Í fjármálum verður ráðist í heildarúttekt á sjóðum bæjarins með það að markmiði að auka gagnsæi og stöðva bruðl með skattfé. Liður í því verður að endurskipuleggja nefndir og ráð sveitarfélagsins ásamt því að afnema innviðagjaldið sem síðasta bæjarstjórn lagði á. þá verður hafið samtal við ríkið um að fá afhent landsvæði sem nú eru í eigu ríkisins og þróunarfélagsins Kadeco.

Sókn í leikskóla- og skólamálum

Nýja bæjarstjórnin ætlar strax í aðgerðir til að bregðast við stöðunni í leikskólamálum. Gerð verður aðgerðaáætlun til að fjölga leikskólakennurum og lækka inntökualdur barna í bænum. Til að fylgja því eftir verður sett á laggirnar sérstakt leikskólaráð ásamt svokölluðum „spretthópi“ um leikskólamál.

Í grunnskólunum verður áhersla lögð á eflingu samræmdra árangursmælinga og mun sú vinna fara fram í nánu samstarfi við skólasamfélagið á svæðinu.

Áhersla á íþróttir, fjölskyldur og fegrun bæjarins

Íþróttamál fá talsvert vægi á næstu vikum. Meirihlutinn hyggst undirbúa samninga við íþróttafélögin í Reykjanesbæ um aukinn stuðning sem á að skila sér í lækkun æfingagjalda fyrir iðkendur. Þá verður hafið samtal við íþróttahreyfinguna um framtíðarsýn, sérstaklega hvað varðar uppbyggingu og viðhald íþróttamannvirkja.

Fyrir fjölskyldur og umhverfið almennt stendur til að:

• Hefja skipulagningu á stórauknu lóðaframboði fyrir sérbýli.

• Hefja lagningu nýrra göngu- og hjólastíga og fjölga bekkjum við stíga bæjarins.

• Ræsa sérstakt átak í trjárækt, gróðursetningu og almennri fegrun umhverfisins.

Stuðningur við atvinnulífið

Að lokum boðar nýi meirihlutinn einfaldari ferla og hraðari ákvarðanatöku fyrir atvinnulífið. Til stendur að undirbúa aukið framboð atvinnulóða með sérstaka áherslu á lítil og meðalstór fyrirtæki, auk þess sem ráðist verður í markaðssetningu á styrkleikum Reykjanessvæðisins til að laða að ný fyrirtæki og auka fjárfestingu.

„Við ætlum að gera allt sem í okkar valdi stendur til að standa við þessi fyrirheit og vinna markvisst að því að gera Reykjanesbæ að enn betri stað til að búa, starfa og ala upp fjölskyldu,“ segir að lokum í yfirlýsingu þeirra Vilhjálms og Gunnlaugs.