Ekið á stein, staura og skilti
Töluvert um umferðaróhöpp sökum hálku
Tveir ökumenn óku á ljósastaura, þriðji ók á skilti og fjórði á stein. Þetta er meðal umferðaróhappa sem urðu í umdæmi lögreglunnar á Suðurnesjum í vikunni. Flest þessara óhappa áttu sér stað í gær með þeim hætti að ökumenn misstu stjórn á bifreiðum sínum í hálku.
Þá varð árekstur á hringtorginu skammt frá Flugstöð Leifs Eiríkssonar, einnig í gær. Þar hafnaði bifreið aftan á annarri. Í hinni síðarnefndu voru þýskir ferðamenn. Engin slys urðu á fólki í framangreindum tilvikum.
Loks voru tveir ökumenn sektaðir fyrir að leggja bifreiðum sínum ólöglega og skráningarnúmer voru fjarlægð af þremur bifreiðum, einni sem var ótryggð og tveimur sem ekki höfðu verið færðar til skoðunar innan tilskilins tímaramma.
