Einstaklega góðir samningar fyrir Reykjanesbæ, segir Deloitte

Sjálfstæðismenn í meirihluta bæjarráðs Reykjanesbæjar segja í bókun sem lögð var fram á fundi í morgun að með samningum um sölu og kaup í HS Orku og HS Veitu, muni Reykjanesbær verða meirihlutaeigandi í þeim hluta Hitaveitu Suðurnesja sem varðar upprunalegt hlutverk hennar, þ.e. sala á heitu og köldu vatni ásamt rafmagni til íbúa. Ferskvatnslindir verði einnig í eigu veitna og forgangur íbúa af rafmagni, heitu og köldu vatni verði tryggður.

„Með samningum þessum er Reykjanesbær að eignast 66,7% í veituhluta Hitaveitu Suðurnesja og tryggja að auðlindin er komin í opinbera eigu. Við þessi kaup Reykjanesbæjar fyrir um 4,3 milljarða kr. eykst skráð eignarvirði bæjarins í veitunum úr 5,1 milljörðum kr. í yfir 7 milljarða kr,“ segir ennfremur í bókuninni.

Meirihlutinn segir að með þessu fari Reykjanesbær út úr áhættusamri uppbyggingu virkjana og samkeppnisrekstri með sölu á hlut sínum í HS orku hf. fyrir 13,1 milljarð kr. „Þessi viðskipti eru á sama verði og bauðst öðrum sveitarfélögum árið 2007 þegar þau seldu sig út úr Hitaveitu Suðurnesja, þrátt fyrir að HS hf. hafi rýrnað í verðmati frá þeim tíma.
Reykjanesbær fékk fyrirtækið Deloitte til ráðgjafar við samningsgerð og að meta samningsdrög. Niðurstöður hafa verið kynntar í bæjarráði. Umsögn fyrirtækisins er að samningarnir eins og þeir liggja fyrir séu einstaklega góðir fyrir Reykjanesbæ, eins og fram kom á umræddum fundi bæjarráðs,“ segir í bókun meirihlutans.

Tekist var harkalega á um málið á bæjarráðsfundi í morgun. Sjá nánar fundargerð bæjarráðs hér.
---