Ein í messu á jóladag

Fremur óvanaleg staða kom upp í messu á jóladag í Innri-Njarðvíkurkirkju þar sem einungis ein manneskja sótti athöfnina. Anna Meyvantsdóttir sem var eini gesturinn í messunni segir að þetta hefði verið falleg athöfn og synd að enginn skildi hafa lagt leið sína í kirkjuna til þess að hlusta á messu séra Baldurs Rafns sóknarprests. Auk Önnu var kórinn mættur ásamt presti, organista og meðhjálpara.

Messan hófst klukkan 11 á jóladagsmorgun en þá má gera ráð fyrir því að margir hafi verið í rólegheitunum heimavið. Séra Baldur Rafn segir að þetta sé að verða staðan í þessari fyrstu messu á jóladegi, fólk sé einfaldlega ekki komið á ról á þessum tíma. Hann segir að hugsanlega megi skoða það að breyta tímasetningu á þessari messu en Baldur stýrir jafnan nokkrum athöfnum á jóladag í sinni sókn. Hann segir að í áraraðir hafi stór fjölskylda mætt til messu í Innri-Njarðvík en eftir að þau hafi flutt burtu hafi aðsóknin verið dræm. Hann var annars sáttur við kirkjusókn yfir hátíðarnar sem hann sagði vera með svipuðu móti og undanfarin ár.