Efla samstarf fyrirtækja á sviði jarðhitamála.

Ragnheiður Elín Árnadóttir, iðnaðar- og viðskiptaráðherra, og Ségolène Royal, orku- og umhverfisráðherra Frakklands, áttu í gær hádegisverðarfund í Bláa lóninu. Þetta var í þriðja sinn sem ráðherrarnir hafa fundað, en þeir tveir fyrri áttu sér stað í París fyrr á þessu ári og í fyrra í tengslum við ráðstefnur Fransk-íslenska verslunarráðsins um nýsköpun, ferða- og orkumál. 

Fyrir fundinn voru ráðherrarnir viðstaddir undirritun á samstarfssamningi milli íslensku og frönsku jarðhitaklasanna. Þar er kveðið á um vilja til eflingar á samstarfi fyrirtækja í löndunum tveimur á sviði jarðhitamála. 

Á fundi ráðherranna kom fram vilji þeirra beggja til að styðja við enn frekari samstarf íslenskra og franskra fyrirtækja á sviði jarðvarmanýtingar. Frönsk stjórnvöld hafa sýnt jarðhitanýtingu aukinn áhuga á síðustu misserum, einkum á sviði húshitunar. Ríkjaráðstefna Loftslagssamnings SÞ verður haldin í París í desember n.k. þar sem Ísland og Frakkland munu hafa frumkvæði um stofnun samstöðuhóps stuðningsríkja jarðhitans – Global Geothermal Alliance sem þar verður kynnt formlega. 

Eftir hádegi voru heimsótt fyrirtæki innan Auðlindagarðsins sem eiga það sammerkt að nýta jarðvarmann frá virkjunum HS Orku í Svartsengi og á Reykjanesi með einum eða öðrum hætti í starfsemi sinni. Þar má nefna auk Bláa lónsins, Carbon Recycling International sem nýtir útblástur Svartsengisvirkjunar til eldsneytisframleiðslu, ORF sem framleiðir hágæða snyrtivörur, Reykjanesvirkjun þar sem sýningin „Orkuverið jörð“ er, Stolt Sea Farm, sem framleiðir senegalflúru með affalli Reykjanesvirkjunar og Haustak sem nýtir gufu frá sömu virkjun til þurrkunar á ýmsum fiskafurðum.