Efast um lögmæti samningsins

Atli Gíslason, lögfræðingur og þingmaður Vinstri grænna, telur kaupsamning Reykjanesbæjar og Geysis Green Energy kunna að brjóta í bága við sveitarstjórnarlög. Hann tekur þar með undir sjónarmið A-listans sem komu fram í bókun á bæjarráðsfundi í gær.

Bæjarfulltrúar A-listans vísa í 65. gr Sveitarstjórnarlaga sem fjallar um miklar fjáfestingar og sölu fasteigna. Í henni segir að hyggist sveitarstjórn ráðast í fjárfestingu og áætlaður heildarkostnaður eða sveitarfélagsins í henni nemi hærri fjárhæð en fjórðungi skatttekna yfirstandandi reikningsárs sé skylt að leggja fyrir sveitarstjórn umsögn sérfróðs aðila um kostnaðaráætlunina, væntanleg áhrif á fjárhagsafkomu sveitarsjóðs á fyrirhuguðum verktíma og áætlun um árlegan rekstrarkostnað fyrir sveitarsjóð, sé um hann að ræða.

„Á sama hátt skal afla álits sérfróðs aðila áður en sveitarstjórn staðfestir samninga um framkvæmdir eða þjónustu við íbúa sveitarfélagsins sem gilda eiga til langs tíma og hafa verulegar skuldbindingar í för með sér,“ segja bæjarfulltrúar A-listans þeir Guðbrandur Einarsson og Eysteinn Jónsson. Þeir telja að með kaupum GGE á meirihluta Reykjanesbæjar í HS Orku verði nýting á orkuauðlindum svæðisins á forræði einkaaðila næstu áratugina. Verið sé að afhenda erlendum aðilum orkuframleiðslu á Suðurnesjum á niðursettu verði.

Sú spurning hefur vaknað hvort með þessum samningum sé verið að tryggja orku til væntanlegs álvers í Helguvík en Grindvíkingar hafa ekki farið leynt með þá skoðun sína að ekki sé sjálfgefið að orka frá þeirra sveitarfélagi fari til Helguvíkur þar sem þeir vilji fremur nýta hana til atvinnuuppbyggingar í heimabyggð.

Pressan.is hefur í gær eftir Ágeiri Margeirssyni, forstjóra GGE, að samningurinn styðji við fyrirhugaðar framkvæmdir vegna álvers í Helguvík „auk annarrar uppbyggingar íslensks samfélags“.

Helstu rök sjálfstæðismanna í Reykjanesbæ eru þau að HS veitur verði áfram í opinberru eigu og tryggt að jarðhitaréttindin og landið verði áfram í eigu almennings. Ekki síst muni nýting auðlindarinnar skapa bæjarfélaginu tekjur um ókomin ár. Þá sé bæjarfélagið að draga sig út úr áhættusamri uppbyggingu virkjana og samkeppnisrekstri.