Dýrbítur leggst á fé við Grindavík

Dýrbítur særði rollu það alvarlega við Grindavík nú síðdegis að aflífa þurfti rolluna. Stórt stykki hefur verið bitið úr kjamma rollunnar.

Lögreglan í Keflavík hefur verið kölluð til og er þessa stundina á vettvangi í Grindavík.

Theodór Vilbergsson er eigandi rollunnar. Hann sagði í viðtali við Víkurfréttir að færst hafi í vöxt að hundum sé sleppt lausum í hólf þar sem rollubændur hafa kindurnar sínar eftir að þær koma af fjalli á haustin.

Hundarnir hafa verið á hlaupum á eftir rollunum en síðdegis hafi hundurinn sært eina rollu það alvarlega að aflífa þurfti hana. Önnur rolla var einnig bitin af hundi síðdegis, svo úr blæddi.

Rollur eru í hólfum bæði í Þórkötlustaðahverfi og einnig í Járngerðarstaðahverfi við Grindavík. Theodór segir sama vandamál verða á báðum stöðum, enda hafi hundaeign í Grindavík farið vaxandi og reglulega megi sjá hunda á hlaupum á eftir rollum á þessum stöðum.


Nánar um málið á morgun, miðvikudag.

Myndin: Rollan er illa farin eftir dýrbítinn og þurfti að aflífa hana.