Dýralíf í Höfnum

Það styttist óðum í það að Einangrunarstöð Reykjanesbæjar opni en hún er staðsett í Höfnum og hefur það hlutverk að geyma ýmsa innflutta hunda og ketti í sóttkví þar til þau mega hitta sína eigendur.

Kristín Jóhannsdóttir, eigandi stöðvarinnar, sagði í samtali við Víkurfréttir að framkvæmdin gangi mjög vel: „Það er allt samkvæmt áætlun en við opnum 1. desember næstkomandi.“ Hún sagði einnig að það væru strax komnir biðlistar svo það verður nóg að gera hjá henni fyrstu mánuðina.

Aðeins hefur verið til ein einangrunarstöð hér á landi en hún er í Hrísey en sú staðsetning hefur þótt afar óheppileg. Stefán Björnsson, umsjónarmaður Einangrunarstöðvarinnar í Hrísey, óttast enga samkeppni. Hann sagði í samtali við Víkurfréttir fyrir nokkru að hann væri með biðlista fram á næsta ár og þar af leiðandi myndi önnur sóttkví ekki hafa áhrif á rekstur einangrunarstöðvarinnar í Hrísey.

Einangrunarstöð Reykjanesbæjar hefur pláss fyrir 27 hunda og níu ketti á mánuði en Kristín býst við því að þau pláss verði öll í notkun til að byrja með en síðan fari þetta í venjulegt horf eftir nokkra mánuði. Þeir sem vilja flytja inn hunda og ketti þurfa að fara í gegnum strangt ferli sem krefst ýmissa vottorða ásamt því sem að dýrin þurfa að fara í gegnum sérstakt brautarferli.

„Ég tek á móti allskonar hundum og köttum en síðan eru náttúrulega til dýr sem fá ekki að koma til landsins,“ sagði Kristín. Samkvæmt yfirdyralaeknir.is, sem er vefsíða embættis yfirdýralæknis, eru nokkrar tegundir af hundum sem fá ekki innflutningsleyfi en það eru t.d.:

a) Hvolpafullar tíkur.
b) Kettlingafullar læður.
c) Tíkur með hvolpa á spena.
d) Læður með kettlinga á spena.
e) Dýr sem hafa undirgengist aðgerðir fyrir innflutning og þarfnast eftirlits eða eftirmeðferðar af nokkru tagi.
f) Hunda af eftirfarandi tegundum, svo og blendinga af þeim:
1. Pit Bull Terrier/Staffordshire Bull Terrier
2. Fila Brasileiro
3. Toso Inu
4. Dogo Argentino
5. Aðrar hundategundir eða blendinga, skv. ákvörðun landbúnaðarráðherra í hverju tilfelli, að fenginni umsögn yfirdýralæknis
g) Blendinga af úlfum og hundum.

Það þykir því ljóst að það verður mikið dýralíf í Höfnum í desember. Þó svo að dýrin sjáist ekki beint þá vitum við allavega af því.