Dularfullur dauðdagi fiðurfés–„Skiljum ekkert í málinu“, segir eigandi eggjabúsins

Starfsmönnum sorphreinsunarfyrirtækisins Njarðtaks í Reykjanesbæ brá heldur betur í brún sl. mánudagsmorgun þegar þeir tóku sorp frá eggjabúinu Gróðri í Keflavík. Lifandi hænur flugu úr sorpgámnum og inn í ruslabílinn. Lögreglan í Keflavík rannsakar nú málið en hérðasdýralæknir er búinn að kynna sér málið og segir því vera lokið af sinni hálfu.
Reynir Jónsson, eigandi Gróðurs sagðist alls ekkert skilja í þessu máli. „Við létum hænurnar út í gám á föstudag en við teljum ólíklegt að þær hafi lifað af í gámnum í frostinu í fjóra daga. Það kannast enginn hér við að hafa sett hænur út í gám um helgina. Ég vil taka það fram að við slátrum ekki hænum heldur eru þær settar á sláturhús. Við erum með varphænur í búinu sem drepast eins og gengur og þá eru þær settar í poka sem bundið er fyrir, eða lokaðan kass og síðan út í gám og það sér hver maður hvort hænurnar eru dauðar eða lifandi þegar þær eru settar í poka. Mér finnst þetta mál bara mjög skrýtið en við verðum auðvitað að taka afleiðingunum ef einhver ber eitthvað upp á okkur, við getum ekkert gert“, segir Reynir.
Að sögn Magnúsar Guðjónssonar framkvæmdastjóra heilbrigðiseftirlitsins er þetta í fyrsta sinn sem hann fær tilkynningu um lifandi hænur í sorpgámi umrædds fyrirtækis enda eru slík mál ekki á ábyrgð heilbrigðiseftirlitsins. „Ég tilkynnti atburðinn til Gunnars Arnar Guðmundssonar héraðsdýralæknis á Keldum, sem síðan tekur ákvörðun um hvað gert verður í málinu“, segir Magnús.
Gunnar Örn sagði í samtali við Víkurfréttir að hann myndi ekkert aðhafast að svo stöddu en hann fór og skoðaði eggjabúið í dag og talaði við starfsfólk. „Okkur finnst skrýtið hvernig þetta á að hafa gerst. Fuglinn er snúinn úr hálsliðnum, settur í poka sem bundið er fyrir og að lokum settur út fyrir í ruslagám. Búið er að tala við starfsmenn og enginn þeirra kannast við að hafa sett hænurnar út í gám. Málinu er lokið af okkar hálfu en við ítrekuðum við starfsmenn að þeir yrðu að sannreyna hvort fuglarnir væru dauðir áður en þeir væru settir út í gám, sem þeir segjast þó hafa gert hingað til“, segir Gunnar Örn og telur ekki útilokað að umræddar hænur hafi ekki komið frá eggjabúinu Gróðri heldur hafi einhver sett þær í gáminn.