Diddú gladdi gesti

Söngkonan landsþekkta Sigrún Hjálmtýsdóttir, eða Diddú, gladdi augu og eyru gesta á Nýárstónleikum Tónlistafélags Reykjanesbæjar í Listasafni Reykjanesbæjar í Duus-húsum á sunnudag.

Hún var þar komin ásamt Salonsveit Sigurðar Ingva Snorrasonar, en á efnisskrá voru ljúfir söngvar, valsar og polkar ættaðir frá Vín. M.a. voru flutt verk eftir Johann Strauss og fleiri góðkunna höfunda og skilaði Diddú sínum lögum af alkunnri snilld. Þá var valinn maður í hverju rúmi í hljómsveitinni sem gerði tónleikana að frábærri skemmtun. Á myndinni sést Diddú túlka Anninu úr óperettunni Nótt í Feneyjum eftir Strauss.