Delta byrjað með þriðja daglega flugið frá Bandaríkjunum

Flugvél Delta Air Lines lenti á Keflavíkurflugvelli í morgun, 28. maí, í fyrstu ferð ársins frá Minneapolis/St. Paul. Þar með er þriðja daglega flugáætlun Delta hafin. Flug frá New York hófst 1. maí og frá Boston 20. maí.

Alls eru 554 sæti daglega í boði í Boeing 757 vélum Delta í Íslandsfluginu. Í sumar mun Boeing 767 þota annast flugið frá New York og eykst daglegt sætaframboð þá í 612.

Ísland er fyrsta Evrópulandið sem heimilaði komu fullbólusettra bandarískra ferðamanna án þess að þeir þurfi að fara í sóttkví. Ferðaþyrstir Bandaríkjamenn hafa tekið því fagnandi og sér þess merki hjá fyrirtækjum í ferðaþjónustu um allt land.

Það er til marks um sterka stöðu sem áfangastaðar fyrir bólusetta Bandaríkjamenn, að á ferðasíðu New York Times sl. miðvikudag er Ísland talið upp sem einn af sjö vinsælustu ferðamannastöðum Evrópu (most popular tourist destinations). Hinir eru Króatía, Frakkland, Grikkland, Ítalía, Tyrkland og Bretland.