Degi íslenskrar tungu fagnað víðs vegar í Reykjanesbæ

Í dag er Dagur íslenskrar tungu en í öllum skólum Reykjanesbæjar er dagsins minnst með margvíslegum hætti og við ráðhús bæjarins hefur íslenski fáninn verið dreginn að húni. Þá hefst stóra upplestrarkeppnin einnig í skólum í dag og er almenningur í landinu sérstaklega hvattur til málvöndunar á þessum degi.

Dagur íslenskrar tungu hefur verið haldinn hátíðlegur á fæðingardegi Jónasar Hallgrímssonar, 16. nóvember, samkvæmt tillögu menntamálaráðherra frá árinu 1996. Menntamála- og menningarmálaráðuneytið hefur árlega beitt sér fyrir sérstöku átaki í þágu íslensks máls og helgað þennan dag rækt við það. Með því móti beinist athygli þjóðarinnar að stöðu tungunnar, gildi hennar fyrir þjóðarvitund og alla menningu.