Dagur hinna veiku flugfarþega

Tvívegis hafa flugvélar á leið yfir Atlantsála þurft að lenda í Keflavík í dag með veika farþega eða áhafnarmeðlimi.

Nú síðdegis lenti í Keflavík Airbus A330 frá Lufthansa á leið sinni frá Munich í Þýskalandi til San Francisco í Bandaríkjunum. Farþegi um borð veiktist og voru sjúkrabílar frá Brunavörnum Suðurnesja tiltækir á flugvellinum til að taka á móti farþeganum. Hann var fluttur á Landsspítala í Fossvogi en er allur að braggast, samkvæmt upplýsingum frá lögreglunni á Suðurnesjum.

Á tíunda tímanum í morgun barst annað útkall þar sem áhafnarmeðlimur um borð í þotu frá Delta Airlines á leið frá Amsterdam í Hollandi til Detroit í Bandaríkjunum veiktist. Eins og síðdegis þá var sjúklingurinn fluttur á Landsspítalann í Reykjavík.