Dagskrá Ljósanætur: Allt að gerast í kvöld!

Mikið verður um að vera um allan bæ í kvöld þar sem Ljósanæturdagskráin er að fara í gang fyrir alvöru.

Í dag hafa verið ótal uppákomur í gangi, jafnt sýningar sem tónlistaratriði, en í kvöld er einnig mikið á döfinni.

Páll Rósinkrans verður með Eric Clapton tribute-tónleika á Ránni og hefjast þeir kl. 22 og svo verður R&B sveitin VAX að spila á Zetunni frá 23.30.

Klukkan níu heldur Duus KE í Ljósanætursiglingu þar sem boðið verður upp á veitingar, kokteila og ljúfa tónlist.

Listhópurinn ARG, sem samanstendur af ungum Suðurnesjamönnum, stendur fyrir sýningu í Sundhöll Keflavíkur sem hefst í kvöld kl. 19.

Við opnun myndlistarsýningar Ásu Ólafsdóttur í Listasafni Reykjanesbæjar í Duushúsum kl. 18 leikur Dúettinn Djass, Birta Rós Sigurjónsdóttir og Steingrímur Karl Teague, ljúfa tónlist.

Þá opnar Prjónastofa Katrínar að Hólagötu í Njarðvík klukkan 20. Harmonikkufélagið leikur fyrir dansi.

Að lokum má geta þess að Guitar Islancio verður með tónleika í Duushúsum og er aðgangur ókeypis meðan húsrúm leyfir.