Búið að opna Keflavíkurflugvöll aftur eftir flugóhapp
– Farþegaþota útaf braut með 143 manns um borð
Búið er að opna Keflavíkurflugvöll að nýju en honum var lokað seinni partinn í dag í kjölfar þess að farþegaflugvél frá Primera Air með 143 manns um borð hafnaði utan við flugbraut í lendingu á flugvellinum.
Farþegar vélarinnar voru fluttir í Flugstöð Leifs Eiríkssonar, þar sem flugfélagið hefur boðið þeim upp á áfallahjálp. Þá hefur farangurinn úr vélinni einnig verið fluttur í flugstöðina.
Stefnt er að því að ná flugvélinni aftur inn á braut fyrir myrkur svo hægt sé að opna norður/suður flugbraut Keflavíkurflugvallar að nýju. Austur/vestur flugbraut Keflavíkurflugvallar hefur verið lokuð vegna framkvæmda við brautina. Hún var hins vegar opnuð síðdegis til að sinna flugi á meðan hin brautin er lokuð vegna óhappsins.
