Bryndís Gunnlaugsdóttir hætt í bæjarstjórn

Bryndís Gunnlaugsdóttir, bæjarfulltrúi Framsóknarflokks í Grindavík, hefur óskað eftir lausn frá störfum. Áður hafði Bryndís verið í leyfi frá 1. júní á síðasta ári. Í beiðni hennar segir að í ljósi breytta aðstæðna geti hún ekki lengur sinnt bæjarstjórnarstörfum ásamt því að vera í fullu starfi á höfuðborgarsvæðinu og þurfi því því miður að biðjast lausnar.

 

Í bókun hennar sem lögð var fram á fundi bæjarstjórnar Grindavíkur síðasta þriðjudag segir:

 

„Ég vil þakka bæjarbúum Grindavíkur fyrir það traust sem þeir hafa sýnt mér frá því að ég var fyrst kjörin í bæjarstjórn árið 2010, það hefur verið sönn ánægja að fá að starfa í þágu íbúa og bæjarfélagsins. Einnig vil ég þakka félagsmönnum í Framsóknarfélagi Grindavíkur sem og samstarfsfólki mínu í bæjarstjórn fyrir gott samstarf. Að lokum við ég sérstaklega þakka starfsfólki bæjarins fyrir gott samstarf enda er hlutverk Grindavíkurbæjar fyrst og fremst að veita þjónustu við íbúa bæjarins og þar gegnir starfsfólk bæjarins lykilhlutverki.“

 

Páll Jóhann Pálsson mun taka sæti hennar í bæjarstjórn. Á fundi bæjarstjórnar í vikunni bókuðu fulltrúar Framsóknarflokks, þeir Páll Jóhann Pálsson og Hjörtur Waltersson að þeir þökkuðu Bryndísi fyrir samstarfið. Í bókun þeirra sagði:  „Við undirritaðir bæjarfulltrúar Framsóknar þökkum Bryndísi Gunnlaugsdóttur fyrir gott samstarf og það óeigingjarna starf sem hún hefur unnið fyrir bæjarfélagið og Framsóknarfélag Grindavíkur, og vekjum athygli á því að erfitt verður að fylla það skarð sem Grindavíkurbær hefur hlotið við að missa duglegan og vel menntaðan lögfræðing frá störfum. 

Ekki er víst að bæjarbúar geri sér grein fyrir því hve mikilvægt það er fyrir bæjarfélagið að hafa vel menntað og duglegt fólk við stjórn bæjarins.“