Bruni út frá lampa

Mikill erill var á slökkvistöð B.S. í síðustu viku. Sjúkraflutningar voru 26 þar af voru 2 bílar sendir samtímis út vegna umferðaslyss sem varð á Hafnargötu þann 2. mars. Farið var með einn einstakling á HSS til skoðunar vegna gruns um reykeitrun.
Ósk barst til slökkviliðsins um aðstoð við að reykræsta íbúð. Þegar komið var á staðinn var óskað eftir sjúkrabíl til að flytja íbúa á HSS til skoðunar vegna hugsanlegrar reykeitrunar. Þar mátti ekki miklu muna að illa færi en lampi hafði oltið ofan á sæng og hitinn frá perunni kveikt í sænginni. Enginn reykskynjari var í íbúðinni. „Aldrei er nógu oft brýnt fyrir fólki að vera með þann lágmarks eldvarnarbúnað sem reykskynjari er, því að það getur skipt sköpum um líf eða dauða ef eldur verður laus“, segir Jón Guðlaugsson varaslökkviliðsstjóri B.S.
Beiðni um aðstoð við dælingu barst til slökkviliðsins 2.mars kl. 22:45 en vatn hafði komist í kjallara íbúðar í Njarðvík. Útköll á slökkvibíla voru 3 í vikunni en sem betur fer voru það allt minniháttar atvik.