Brunavarnir Suðurnesja: Mikil fækkun brunaútkalla

Árið 2005 er að mörgu leiti sögulegt hjá Brunavörnum Suðurnesja. Þrátt fyrir stækkandi samfélag s.s. fólksfjölgun og aukin umsvif á flestum sviðum, þó sérstaklega í byggingariðnaði, eru færri útköll í ár og brunatjón eru í sögulegu lágmarki; þetta ár er einstakt að því leiti að ekki hefur þurft að boða heildarútkall á slökkviliðið vegna bruna eða annarra tilfella á útkallssvæði BS, þ.e. í Garði, Reykjanesbæ eða Vogum, en með góðri samvinnu hefur slökkviliðið aðstoðað í stórbrunum í öðrum nágrannabyggðarlögum.
Margir þættir starfseminnar eiga þátt í þessu „góðæri“ hjá BS en árangurinn endurspeglar sig fyrst og fremst í jákvæðu viðhorfi íbúa, meiri meðvitund og þátttöku þeirra í forvörnum. Við erum að uppskera sýnilegan árangur m.a. af árlegu fræðsluátaki og forvarnarstarfi BS, en síðan 1998 höfum við staðið fyrir umfangsmiklum rýmingaræfingum í leik-og grunnskólum á öllu útkallssvæðinu. Markmiðið með þeim er að skipuleggja, endurskoða og æfa innra skipulag s.s. hlutverk starfsfólks og nemenda í neyðartilfellum og sannreyna brunavarnir í mannvirkinu þ.e. brunahólfun, reykþéttingar, flóttaleiðir og virkni öryggis- og brunakerfa. Mikil og góð samvinna hefur verið við starfsfólk og stjórnendur þessara stofnanna og hafa æfingarnar því tekist vonum framar og skilaboðin öflug; fjöldi þátttakenda í ár var um 3640, eða um 3100 börn og nemendur og 540 starfsmenn.

Helstu brunatjón og útköll á árinu 2005 voru:
7. desember, eldur í íbúðarhúsi að Hraunholti 8 í Garði. Slökkvilið BS fékk tilkynningu frá Neyðarlínu um klukkan 9:20 þar sem tilkynnt var um eld í íbúðarhúsi. Þegar slökkvilið kom á staðinn var töluverður eldur í eldhúsi og kom í ljós að kviknað hafði í feiti vegna eldamennsku. Ein kona var í húsinu og komst hún út af sjálfsdáðum og tilkynnti um eldinn. Vel gekk að ráða niðurlögum eldsins og var slökkvistarfi lokið um kl. 10:12. Töluvert tjón var af völdum hita og reyks sem fór um allt húsið.
5. desember, eldur í Ofnasmiðju Suðurnesja, Víkurbraut. Slökkvilið BS fékk tilkynningu frá Neyðarlínu um mikla bruna- og gaslykt þegar starfsmaður var að mæta til vinnu um kl 08:00 um morguninn. Örskömmu síðar kom slökkvilið á staðinn. Þá kom í ljós að eldur var að mestu kulnaður en mikill reykur var um alla bygginguna. Frekari skoðun leiddi í ljós að eldur hafði logað í „ruslakörum“ inni á gólfi, en kvöldið áður hafði verið unnið við að fúaverja timbur og sennilega orðið sjálfsíkveikja í olíublautri tusku í ruslakari. Af óskiljanlegum ástæðum hafði eldurinn ekki náð að breiðast út. Töluverð ummerki voru um hita, m.a. höfðu gluggar í austurhlið hússins sprungið og annað brennalengt efni í nálægð við brunann sviðnað og kolast. Tjón var að mestu tengt þrifnaði, en mikil mildi þykir að ekki fór verr.
24. nóvember, eldur í Malbikunarstöðinni í Helguvík. Slökkviliðið fékk tilkynningu um töluverðan eld sem logaði í rykskilju í verksmiðjunni. Hárrétt viðbrögð starfsmanna blöstu við slökkviliðsmönnum þegar slökkvilið kom á staðinn og höfðu þeir náð að slökkva eldinn að mestu, tjón var minniháttar.
29. október, eldur í iðnaðarhúsi/spilasal í Grófinni 7. Þegar slökkvilið kom á staðinn var töluverður eldur í rýminu sem er innan við 100 fermetrar. Kom í ljós að kviknað hafði í sófa. Greiðlega gekk að ráða niðurlögum eldsins og var slökkvistarfi lokið á innan við 30 mínútum, tjón var minniháttar.
11. október mengunaróhapp í m/s Geysir. Beiðni barst slökkviliði BS um aðstoð vegna þess að gámur hafði laskast þegar m/s Geysir sigldi stórsjó milli USA og Íslands. Skipið hafði fengið á sig brotsjó og nokkrir gámar á dekki losnað. Eldfimt polyester efni hafði lekið úr þrem 1000 lítra plastkörum á dekk skipsins. Brunavarnir Suðurnesja aðstoðuðu við að losa gáma frá borði og tryggja vettvang meðan verið var að meðhöndla varninginn.
27. febrúar eldur um borð í m/s Breka KE 61. Tilkynnt var um eld um borð í Breka sem var staðsettur í Njarðvíkurhöfn. Þegar slökkvilið BS kom á staðinn var töluverður eldur í stakkageymslu; reykkafarar voru strax sendir inn og réðu niðurlögum eldsins á fáum mínútum. Litlu mátti muna að þarna yrði stórtjón en með vasklegri framgöngu slökkviliðsmanna tókst að forða því; tjón var því einangrað við stakkageymsluna og minniháttar í heild sinni.
15. janúar, eldur um borð í m/b Grímsnes. Slökkvilið BS fékk tilkynningu frá Neyðalínu um klukkan 9:00 á laugardagsmorgni, þá var áhöfn að mæta um borð til að fara í róður, eldur var í lúkar bátsins en greiðalega gekk að slökkva eldinn og var tjón minniháttar.

Þrátt fyrir færri útköll hefur árið liðið á ógnarhraða, margt hefur þó áunnist þegar maður lítur um öxl, má þar helst nefna:
Í upphafi ársins var ráðið í lausar stöður í varaliði og endurnýjun í fastaliðinu. Ráðnir voru sjö nýliðar og í framhaldi haldið 80 klukkustunda fornám sem slökkviliðsmenn BS skipulögðu og sáu alfarið um. Brunamálsskólinn viðurkennir námskeiðið og gefur nýliðum réttindi til almennra slökkviliðsstarfa og réttindi til reykköfunar með löggiltum slökkviliðs-og sjúkraflutningamönnum.
Unnið var að uppbyggingu á gámaeiningum og þjálfunarsvæði og nú liggur fyrir að á árinu 2006 munum við taka það í notkun.
Niðurstaða og framtíðarlausn náðist í húsnæðisvanda BS; og er fyrirhugað að byggja nýtt húsnæði fyrir starfsemina á lóð ofan Iðavallar. Með því skapast betri tenging sem styttir útkallstíma í nágrannabyggðir og byggðarkjarna Reykjanesbæjar.
Töluverð endurnýjun og uppbygging átti sér stað í útkallsbúnaði má þar m.a. nefna endurnýjun á tankbíl, öflugri fjarskipti fyrir reykkafara, mengunarvarnarbúnað og nýja hitamyndavél, sem er ein sinnar tegundar á landinu.
Áhersla var lögð á þjálfun á árinu og er áætlað að hver slökkviliðsmaður hafi skilað að meðaltali um 160 klukkustundum í þjálfun á árinu.
Auk þjálfunar og símenntun hér heima útskrifuðust fjórir úr grunnámi sjúkraflutninga, tíu slökkviliðsmenn sóttu árlega þjálfun til Lindesberg í Svíþjóð, en þetta er þriðja árið sem slökkvilið BS skipuleggur slíka ferð þ.e. leigir aðstöðu og þjálfunarsvæði til verklegra þjálfunar, fjórir sóttu námskeið fyrir leiðbeinendur í Revinge í Svíþjóð. Tveir útskrifuðust úr framhaldsnámskeiði í sjúkraflutningum (Neyðarflutningar).
Hér hafa verið rakin helstu aðgerðir og útköll slökkviliðsins á líðandi ári. Góður árangur liðsins byggir á liðsheild og góðri samvinnu við íbúa og aðra í samfélaginu; brunatjón á árinu er í flestum tilfellum minniháttar og sannarlega í sögulegu lágmarki.
Starf slökkviliðsmanna er oftar en ekki við erfiðustu aðstæður og mjög hættulegt; einn mesti árangur liðins er án efa „slysalaust ár“ innan slökkviliðsins. Sá árangur einn og sér er oft vanmetinn. Með tilliti til þeirra verkefna sem eru í vinnslu og þeirra augljósu tækifæra sem felast í ört stækkandi samfélagi á Suðurnesjum er árið 2006, og framtíðin í heild, spennandi tími fyrir BS.

Samantekt: Sigmundur Eyþórsson, slökkviliðsstjóri BS