Brotist inn í Fjölbrautaskóla Suðurnesja

Brotist var inn í Fjölbrautaskóla Suðurnesja um páskana. Innbrotsþjófarnir hafa komist inn í skólann í gegnum nýbyggingu sem verið er að reisa við skólann.

Í innbrotinu var farið inn í mötuneyti skólans og þaðan stolið skiptimynt. Einnig var farið inn í skrifstofu nemendafélagsins þaðan sem fartölvu var stolið. Að sögn Ólafs Jóns Arnbjörnssonar skólameistara voru litlar skemmdir unnar við innbrotið. Ekkert öryggiskerfi var á þriðju hæð skólans þar sem ólíklegt var talið að innbrotsþjófar kæmust þar inn. Vegna nýbyggingarinnar er nú hægt að komast inn á þriðju hæðina og segir Ólafur Jón að öryggiskerfi hafi verið komið fyrir í öllum skólanum. Lögreglan í Keflavík fer með rannsókn málsins.