Breytingar á rekstri vinnuskólans

Menningar,-íþrótta og tómstundaráð og bæjarstjórn Reykjanesbæjar hafa samþykkt breytingar á rekstri Vinnuskólans sumarið 2005.

Helstu breytingar eru þær að fræðsluþáttur Vinnuskólans verður aukinn til muna og vinnuvikum nemenda verður fækkað.

Nemendur í 10. bekk fá sumar vinnu í fjórar vikur í staðinn fyrir sex áður. Einni af þessum fjórum vikum verður varið í fræðslu og starfskynningu þar sem m.a. verður farið í eftirtalda þætti: Mannleg samskipti, sjálfsstyrking, agi, einelti, framsögn og framkoma, forvarnarfræðsla, fjármál einstaklinga, umhverfismál og starfskynning innan stofnunar eða fyrirtækis.

Nemendur í 9. bekk fá vinnu í þrjár vikur í staðinn fyrir sex áður og nemendur í 8. bekk fá vinnu í tvær vikur í staðinn fyrir fjórar áður.

Vinnuskólinn verður settur föstudaginn 10. júní og vinna hefst mánudaginn 13. júní. Umsóknareyðublöð verða send í grunnskólana í byrjun maí og munu þau jafnframt liggja frammi á skrifstofu skólans að Hafnargötu 57.